網上對纖體公司的評論

「某花纖體」有冇用?

我見到「某花纖體」有個$888嘅30次療程....我想知有冇用? 同埋會唔會好hard sell?

• 我識個網友佢上過去，唔係$888，只係噱頭，其實會勁sell你，佢最終用左4-5萬，但其實主要靠佢俾你食D餐單減，做機唔係減好多，如果係咁，就自己搵餐單食好過啦! 個網友話簽完卡先好後悔!!! 另外有個朋友話跳舞其實得30分鐘，跟住就自己返屋企跳，咁join黎做咩，自己做運動好過啦!
• //hk.knowledge.yahoo.com/question/question?qid=7008060401453

• 會好hard sell，同埋你要預左上得去實唔見幾萬蚊，仲要成班sales圍住你，唔俾你走，咁都唔緊要，最慘係唔work，點解呢? 因為呢Ｄ公司全部都係想賺你的錢，加上有報告證實做機唔得的事實已經爆破咗，我有個friend之前就係咁俾人呃左5-6萬。
• //hk.knowledge.yahoo.com/question/question?qid=7006090905198

• 細妹個同事有去某花，不過，唔係最近期的，我唔係咁清楚而家某花興做乜嘢療程，我細妹個同事當時本來都係揀佢地賣廣告果幾款，但係某花D人就話佢唔係咁啱做，所以，sell佢先做D減肥膏同mask，果D凍mask，熱天都凍到佢頂唔順，去同某花理論，佢地又話佢唔適合，不如補錢做熱mask, 點知又辣到佢紅晒(冇腫冇敏感，不過佢話似火燒咁熱辣辣)，結果佢前後使咗四萬幾蚊，只係敷咗四次(好似三凍一熱) ，情願話唔得閒都唔想再去被呃。你去得呢D地方， 一定要好堅持，唔好隨便被人動搖; 我細妹個同事有錢唔志在，不過久唔久都呻囉，我自己就去過江欣燕同商天娥果間貴族; 算平但真係完全冇效，但我因為真係唔係咁有米; 我都使咗一萬九千幾，做晒個course都冇反應，其實由第一堂到最尾果次，佢都不斷sell我多買D乜course物堂，我都不為所動(冇錢嘛)，相反，同我結伴去的同事就係有錢少奶奶; 因為我地時間唔啱，好多時都唔同時間去做，結果，我使咗萬九，但做晒所有療程，佢就使咗四萬; 不斷被sell買course，佢又唔夠堅定囉，好彩佢最後都醒覺，情願唔做; 佢好似做咗一半唔夠，佢話唔想再被人sell嘢, D錢當跌咗算咯。
• //hk.knowledge.yahoo.com/question/question?qid=7006102300962

認識纖體公司的推銷手法

例如「某花纖體公司」推出的限量優惠: 30次療程只需$1,000，很抵吧!

據網友們的實情回報是如此的:

• 得唔得我就唔知啦，但我只知$1000是無可能有30次療程咁多，你join左之後佢一定勁sell你買呢樣嗰樣，當你水魚咁劏，小心d，你無咁上下拒絕人既定力，你就千祈唔好考慮買任何療程。
• 本人試過其他纖體公司，用左好多錢到而家都未走到，仲join緊，每個月d卡數好恐怖，so你自己唸清楚啦。
• 我之前去過亦有參加，俾咗成2萬幾元，但做咗大約個多星期，佢就叫我再加萬多元加做(佢話我只參加了A療程，要加多B和C才有效)，最後我當然無再俾錢，但做完晒都無效果，30次療程只需$1,000只係吸引你上去到時你就知。
• 本人都試過join類似咁既療程, 開頭通常會叫你開一個療程先, 後尾就會氹你開埋咩咩療程，話會更快更有效，話你都想自己健康靚靚架，又會懶係friend俾優惠你，等你以為好抵，諗住試一試， 但之後就越開越多，減肥係無底深潭黎㗎，我諗間間都係咁既銷售手法，定力弱D就死梗。
• //hk.knowledge.yahoo.com/question/question?qid=7007082900971#ooa_hash

• 好似「必救站」$ 688 只係一期錢，佢哋係分18 期架！減到10磅、8磅左右啦(水腫)！九成九都會話唔適合你，於是就狂推介D萬幾2萬蚊D course 比你！開plan之後就同你講個course 唔夠，要加D乜乜物物！埋單就襟計！永遠join完又join，永不停，join個陣又話呢樣得嗰樣得，join完又要你加錢，唔加都得，不過做唔到個效果！D職員就口黑面黑對住你！你話係唔係好離譜！
• 大部份美容院都係用明星效應吸引你，但實際用了多少錢？大家都心知肚明啦！真係咁平？廣告費都幾千萬啦！無 2-3萬基本消費，你都唔洗出門口啦！你簽完合約，攻勢就會一浪接一浪！我朋友去到，本來想做 688，點知出番黎都比左 7000幾佢！佢仲係一個中學生！
• 又好似胡杏兒14天療程，點知上去就知死！朋友126 磅，想減到110-115 到，但之後要俾萬二蚊，仲話呢個plan佢實減到！因為當日full booking，要三日後才開始做，點知除晒衫瞓響床，個顧問又話佢水腫，要join個通淋巴course，個friend話唔join，佢就不停sell，sell 足半粒鐘，咩叫肉隨砧板上，就係咁啦！你一日唔say yes，都唔開始做，簡直浪費時間！到下次又有人再sell，佢只係到咗3次，就已經俾人sell左三萬，人就無瘦到，但銀包就瘦晒，如果你地無胡杏兒咁紅，就唔好去，因為驚大家未減到肚腩，已經一肚氣！
• //hk.knowledge.yahoo.com/question/question?qid=7009082101480#ooa_hash

關於「變娘D」無需食藥便可減肥的推銷:

• 出面咪好多免費幫你減肥，做佢代言人嘅廣告，其中有一單，有個女仔去試，纖體公司講明唔洗食藥，一定係減得好健康嘅，有中醫、西醫幫手睇住，先交五萬，減得最多嗰位，全數俾返你，佢交左錢後，中、西醫俾左一堆藥佢食，佢見冇藥名，當然問係咩來啦，佢哋就同佢講放心，全是健康食品，冇害，總之你食咗一定瘦得健康，佢覺得有問題，所以唔食，間公司就露出狐狸尾巴同佢講，你估真係唔洗食藥就減到咁快咩，話明呢d藥無害，你放心食啦，間間公司都係咁架啦，你可以唔食，但錢一定唔會俾返你，一係你搵多d親戚朋友加入做代言人，搵得越多，我哋就退返錢俾你囉，呢個女仔於是收起咗幾種藥攞去化驗，結果全部都係禁晒嘅藥，食咗分分鐘死人嘅，佢覺得自己受害咗，唔通仲要自己親戚朋友受害埋一份，佢就向一間電台爆料，事件先揚咗出來，你話幾恐怖吖!所以你好好考慮清楚，你俾唔俾得起咁嘅錢，或想唔想俾左呢d錢減咗，然後好快肥番，如果你減到後唔keep住，反彈係一定會。
• //hk.knowledge.yahoo.com/question/question?qid=7006080600013

有無人去過「變娘D」度interview做代言人?

• 唔好去呀！我就係去咗做唔上鏡嘅代言人，我個 case係：兩個月減 20磅，簽卡或者問 Aeon借錢做分期，個總數係四萬九千幾蚊，俾頭嗰兩個月嘅錢（即係5000蚊左右嘅所謂按金），減完變娘 D俾返 D錢你，同埋會供埋個分期，你要去返三至五個分享會度分享心得。初初我問佢減唔到20磅會點，洗唔洗俾錢，佢地話「放心啦，一定減得到，唔會減唔到」，到後來我簽左，再問佢，問到第四次，終於有個真嘅答案：「減唔到無得退錢」，即係無啦啦俾四萬幾五萬銀佢！我又試過問佢哋，如果反彈會點，佢哋話會有treatment俾返我黎 keep住，但係我睇返網上d討論，有人話肥一磅一千蚊，亦有話三十萬！佢哋好鍾意支吾以對，或者係用其他嘢來混淆你嘅！你唔想好似我咁攪到周身債、周身屎，就唔好去！唉～作為過來人，贈你一句「便宜莫貪」，仲有個 case係壹周刊登過，個事主減得6-8磅，結果經壹周刊幫手，都係只肯退返一半，即係二萬幾蚊！
• //hk.knowledge.yahoo.com/question/question?qid=7007042600142

「千得掂」減肥中心可不可靠？

• 我去咗試，服務態度勁唔掂，明明話一小時半搞掂，最後成2個半小時，我去嘅時間已經唔係繁忙時間，你入左房，等左成15分鐘先有人來幫你，包繃帶明明話包30分鐘，但我就包左成45分鐘(勁凍)，跟住又等，又話要做尿液測試，一定要去厠所，太約做半小時運動就走人，我join𠴱個係$1988，佢一包完繃帶就話我輕左1.8磅，全身瘦左2寸，但我就一d都唔覺，因為個磅唔係電子磅，係自已睇，量寸數佢話瘦左0.1寸都睇到，你去到係要做運動30分鐘，你自已在家連續做8日的30分鐘運動都會瘦啦! 當你做做下運動，d職員會入來sell你，又話唔迫你，俾時間你想清楚，但就成日叫你join過貴plan。
• //hk.knowledge.yahoo.com/question/question?qid=7007011803252#ooa_hash

• 千萬唔好試呀，試做完佢哋一定sell 你買course㗎，好難走得甩架，你買左 course 之後去做，佢哋又會sell你買其他 course 好鬼煩架，吾好幫襯呢D連鎖式的鋪頭，佢哋成日都係用超平試做價來吸引水魚㗎，如果有平course 都有好多限制，可能買咗都用唔到。
• //hk.knowledge.yahoo.com/question/question?qid=7008081201039

請問有冇人去過「收薪堂」減肥？
價錢係幾多？減到幾多磅？

• 我去年尾在「收薪堂」減肥，當時我話要減10磅，個consultant話要2萬蚊，跟住我話太貴，佢就減咁d做treatmen同埋見營養師嘅次數，最後個價錢係1萬蚊(呢個價係最平，加上我係學生先有得咁平)，但唔好以為平咗咁多好數，佢要你平時要做番多d運動，其實減肥真係要靠你自己，的起心肝做運動，我係參加「收身堂」嘅失敗例子，其實「收薪堂」真係好貴，好唔抵，參加咗1次以後都唔會再參加!! 我建議你去做gym，去室內泳池游水仲好呀，我而家隔日做gym跑步，1個月瘦左都有4磅呀，記住呀，運動先係最長遠嘅投資。
• 我有兩個朋友去過，兩個都失敗而回，而且好貴。
• 搵咁多明星同佢賣廣告梗係貴啦，我老細去果度減肥，服務真係一流，張玉珊同佢一齊開減肥會，講吓佢嘅減肥療程，但係價錢都係一流，由幾萬升到二十幾萬，你用呢個套餐佢地就話呢樣唔夠果樣唔夠，又要加呢樣果樣，結果埋單要二十幾萬。其實佢哋減肥嘅方法都係俾d餐盒客人返屋企食，同埋瞓係度用機同佢哋做運動，所以如果你自己可以控制下自己嘅飲食，同埋做運動，跟本就唔須要俾錢人洗。
• //hk.knowledge.yahoo.com/question/question?qid=7006070203050

「越溶莊」的銷售手法

• 「越溶莊」係黑店，本人之前在越溶莊買咗泰式按摩套票，後來去咗旅行，遺失咗銀行信用卡，再上去越溶莊做按摩時，就問BA有冇影響銀行的分期過數，叫佢check下公司戶口，BA 查完公司數後，就要求我拿另一張信用卡俾佢， 然後又叫我簽左張單，我沒有為意，就簽左，後來回到家先發覺，佢地收我雙倍錢，多收咗HK$ 12,000，於是上去同佢哋理論，佢哋居然屈我話我買咗佢哋兩個套票，除咗泰式按摩外，仲有facial套票， 我由頭到尾都對佢地嘅facial 無興趣，亦從未想過購買佢地既facial， 佢地此舉擺明係明屈! 越溶莊係啅越集團的旗下公司，估唔到咁大間公司都用如此卑劣的欺騙手法，就此事，我已向消委會投訴，亦在警署落咗口供，如有其他姐妹亦在此店中左招，歡迎聯絡我，我哋聯合起來聲討佢!
• //hk.knowledge.yahoo.com/question/article?qid=6910092000660